لكل أم تجد صعوبة في نوم أطفالها، إليكِ حلا سحريًا للأخذ بيد طفلك إلى عالم الأحلام والنوم الهاديء.. «شيماء عبدالعال» تقدم مجموعة قصص يومية تساعدك على ذلك: حدوتة النهاردة ... «الفأر الذكي» كان ياما كان كان في زمان فأر عايش في جحر صغير في بيت قديم، كان الفأر بيخرج كل يوم بليل يدور علي اكل ليه، وبعد ما ياكل يرجع تاني للجحر بتاعه عشان يستخبي من القطط. وفي يوم من الأيام كان الفأر جعان جدًا وخرج عشان يدور على اكل، لكن للأسف ملقاش حاجه يأكلها فاضطر يبعد عن الجحر بتاعه ويمشي لبعيد يمكن يلاقي أكل ليه برضه ملقاش. قرر الفأر أنه يرجع للجحر بتاعه لأنه تعب من التدوير علي أكل وهو جعان مش قادر هيموت من الجوع وفجأه وهو في طريقه للجحر ظهرت له قطة، الفأر أول ما شافها اتخض وحاول يجري ويهرب ومقدرش من التعب، القطة قربت منه ولسه بتمد ايديها وهتهجم عليه والفأر واقف مكانه مش عارف يعمل ايه، حس انه خلاص القطة هتمسكه وتأكله، جاتله فكرة بص للقطة و قعد يعيط جامد، القطة قالتلوا مالك انا عارفه انك خايف مني لكن معلش انا لازم اكلك انا جعانه اوووي ومصدقت لاقيتك، قالها انا موافق انك تاكليني معنديش مانع، لكن انا كمان هموت من الجوع و خسيت وبقيت رفيع من قلة الاكل، عشان كدة انتي لو كلتيني مش هتشبعي لاني مش لاقي اكل، لكن لو ساعديتني وجبتيلي اكل اكله هتخن وابقي فار مقلبظ ولما تاكليني هتشبعي. الفأر طلع ذكي وقدر يقنع القطه الغبية انها تروح تدورلوا علي اكل ووقف الفار بعيد عن السوبر ماركت وشاور للقطة انها تروح وتخطفلوا حته جبنة رومي كبيرة ليه عشان ياكلها وهو هيستناها، راحت فعلا القطة وخطفت حته جبنة رومي من البائع و جريت، شافها البائع وجاب عصاية كبيرة وجري بيها ورا القطة، راحت للفأر وقالتلوا ها هنعمل ايه لازم نستخبي بسرعه، قالها تعالي نستخبي عندي وراحوا علي البيت القديم اللي فيه الجحر بتاعه، خطف الفأر الجبنة الرومي من القطة و دخل الجحر بتاعه بسرعه و استخبي و قعد يأكل فيها. القطة وقفت برة تقولوا يلا كل بسرعه واخرج عشان اكلك بقي، قعد يضحك الفأر ويقولها صحيح انتي قطة غبية اووووي يعني انا هخرجلك برجليا عشان تاكليني، القطة استغربت و قالتلوا احنا مش كان في بينا اتفاق، الفأر قالها هو الفأر والقطة ممكن يتفقوا علي حاجه برضه. غضبت القطة و لسه بتتلفت وراها عشان تمشي لاقيت بائع السوبر ماركت وفي ايديه العصايه ونزل ضرب فيها، صرخت القطة وهربت منه بالعافية بعد ما اكتشفت هي قد ايه كانت غبية لما وثقت في الفأر وصدقته.